recent
أخبار ساخنة

الفكره " Creative Director "

الفكره

ربنا ميز الإنسان عن باقي المخلوقات وكرمه بنعمة كبيرة جدا. وهي نعمة العقل .. ومقصدش هنا المخ ...لأن كل الحيوانات مثلا عندها مخ ...والمخ ده حاجة مادية موجودة جوة راسك

إنما العقل ده حاجة زي الروح والضمير كده ملهاش مكان محدد .طيب حلو أوي النعمة بقى اللي ربنا ميزنا بيها بنستخدمها ازاي ...وبنستخدمها أد ايه في حياتنا ...وازاي نستفيد منها عشان نطلع أفكار جديدة

الفكره   " Creative Director "

خلق فكرة.

كتير أوي بنسمع عن مصطلح ال " creative director " ..ودي شغلانة المفروض أنها من أهم الشغلانات في مجالات كتير ...زي مجال الإعلانات مثلا ..أو مجال كتابة الروايات والقصص ..أو كتابة الأعمال الفنية ...والمفروض إن الشغلانة دي إنك تبتكر فكرة ما كانتش موجودة .. طيب هل فيه حاجة اسمها إني أخلق فكرة من عدم ؟ .. مفيش حد بيخلق من عدم غير ربنا سبحانه وتعالى .

الله أومال الأفكار الجديدة اللي بنشوفها دي مش خلق من عدم ؟ ... لا يا سيدي الفكرة عبارة عن مزج أو ميكس كده لعناصر كانت موجودة أصلا ...زي مثلا اختراع العربية ...الحديد كان موجود والبلاستيك والكاوتش وكل ده اتمزج بشكل معين فطلع حاجة سميناها عربية .. وزي برضو لما شيف يعمل وصفة أكل جديدة 

مكونات الطبخة كلها موجودة أصلا ...بس هو مزجها بطريقة وبمقادير معينة فطلعت الأكلة الجديدة اللي اسمها كذا كذا دي ...اللي بتعجب بعض الناس وما بتعجبش البعض التاني .. حلو أوي يبقى لما نفكر في فكرة لازم نبقى عارفين إننا مش هنخلق من عدم ..احنا بس هنرتب الحاجات الموجودة في الدنيا بشكل جديد ...فيطلع منتج جديد.

التفكير الطفولي.

كلنا عارفين إن مرحلة الطفولة أكتر مرحلة بيطلع فيها أفكار ..إنما ايه السبب في ده !!؟؟ .. فيه شوية أسباب للموضوع ده ..أولها إن الطفل ما عندوش حاجة اسمها المرة الأخيرة ...إن دي أخر مرة هيفكر فيها أو هيسيب خياله يروح لأبعد الحدود ...يبقى أول حاجة نتعلمها إن مفيش حدود للإبداع والخيال

طيب تاني حاجة بيتميز بيها الأطفال في التفكير ...إن مفيش عوائق تخليه يبطل يفكر ...مش فارق معاه رأي الناس أوي ...مش بيفكر في رد فعلهم أوي ..يا ترى هتعجبهم الفكرة ...يا ترى هيتريقوا عليا ...يا ترى الفكرة دي لو جيت أطبقها هتفشل ولا هتنجح ..الطفل مش فارق معاه كل ده ..بيفكر ويتخيل وبس .

البناء.

طيب حلو أوي أنا فكرت في فكرة عن أي موضوع ...ازاي بقى أكملها وابنيها لحد ما تبقى حاجة في الأخر ؟

الأساس إن المفكر عنده حد أدنى من الثقافة والتعليم يخليه يقدر يكمل فكرته ...بس تعالى نفترض إنه زي أي حد فينا اتعلم في مدارسنا الجميلة اللي طلعت أجيال ما بتعرفش أي حاجة عن أي حاجة ..يكمل فكرته ازاي ؟ .. لازم تقرأ ...أنا عارف إن القراءة للي مش بيحبها صعبة وتقيلة على قلبه 

بس هنعمل ايه !؟ خلينى أصدمك وأقولك إن مفيش مبدع جاهل أو قليل الثقافة والمعرفة ...على الأقل في الحاجة اللي هو شغال عليها ...يا أخي أنت عاوز تنجح من غير ما تتعب ...يعني تعالى نفترض إنك بتشتغل على قصة مسلسل مبنية على إن البطل مثلا عنده مرض معين

لازم يا فنان تقرأ عن المرض ده كويس وتفهم أعراضه وعلاجه ...عشان ما تطلعش تعملنا مسلسل يطلع فيه البطل بيتخبط في دماغه يفقد الذاكرة ويتخبط تاني فترجعله الذاكرة ...الموضوع مش بالسذاجة دي ...يبقى لازم تقرأ عشان تطلع فكرتك حلوة .

اللي خايف يروح.

اللي بيخاف من رد فعل الناس على فكرته ..وإنهم ينقدوها ...عمره ما هيطلع فكرة حلوة ...عادي جدا .....جدا كمان إنك هتلاقي ناس وكتير مش عاجبها فكرتك ...وده لأسباب كتير ...أولها إنك ممكن فكرتك تبقى فكرة وحشة فعلا ...وثانيا إن عمر الناس ما هتتفق على فكرة إنها تحفة 

وعلى رأي محمد رمضان لو نزلت فيديو فيه قرآن على اليوتيوب هتلاقي ناس عاملة Dislike !!! . الناس بتخاف من حاجات كتير ...ومن ضمن الحاجات اللي بيخافوا منها الأفكار الجديدة والناس اللي بتفكر فيها ...ورد فعلهم عليها بيتباين بقى ...فيه اللي يقولك بطريقة كويسة ونقد بناء

وفيه اللي هيتريق عليك ويستهزأ بيك ...وهنا هستشهد بمقولة غاندي الشهيرة ...مش عشان أعمل مثقف والله ..ده عشان هي بالظبط اللي عاوز أقوله ...قال ايه غاندي بقى " في البداية يتجاهلونك, ثم يسخرون منك, ثم يحاربونك, ثم تنتصر"

بره الصندوق خاااالص.

بلاش نختار الأسلوب اللي كنا بنحل بيه الامتحانات بتاعت أخر السنة ...متدورش على أسهل حل ...احنا مش في امتحان ...وما أقصدش هنا التعقيد وإن البساطة وحشة ...لأ خالص ...أقصد ما تستسهلش ...ودماغك ما تروحش لأفكار اتعملت قبل كده ..يعني بلاش لما تفكر تعمل كليب عاوز تطلع فيه المطرب ابن بلد

يبقى لازم يلعب كورة مع العيال في الشارع وياخد رغيف عيش من الراجل اللي ماشي بالعجلة شايل العيش ...ممكن تعمل حاجة تانية ...اللي هي زي ايه ؟ ...أنا مالي أنت فكر ...لما هتزنق أنا في دي .. هفكر فيها. ربنا ميز الإنسان عن باقي المخلوقات وكرمه بنعمة كبيرة جدا وهي نعمة العقل

تابعونا على صفحتنا ليصلكم كل جديد من كاستينج أعمالنا

author-img
Live

تعليقات

ليست هناك تعليقات
إرسال تعليق
    google-playkhamsatmostaqltradent